TRES XERACIÓNS E UN PROXECTO COMÚN

Isto vai para adiante. Ninguén cría que o local social, a futura casa do pobo, centro de reunión da Asociación Tras do Río e do resto dos veciños, se consolidaría. Cos esforzos da colectividade, cadaquén segundo as súas posibilidades, a obra vai indo para arriba. Pasado o tempo, poida que o sacrificio prolongado dos esforzados obre o milagre: que desde este centro se potencie a cooperación e sexa o centro de reunión de todos, tamén dos menos implicados no proxecto. Para os veciños, a importancia desta construción vai máis alá do futuro edificio proxectado, xa que redunda sobre todo en fomento da solidariedade e da cooperación entre os de Tarrío: quen pode quedar parado ante unha colectividade compartindo inquietudes e compromisos, unindo e concentrando esforzos, ilusións e alegrías? Como se pode ver nas fotos, ata as xeracións máis novas amosan espírito cooperativista, axudando os 'avós' a facer masa. Todo un exemplo de iniciativa solidaria, fronte á falta de iniciativa de determinadas administracións públicas, que miran para outro lado ante iniciativas coma esta.